政情：公民講場：飲食業求補貼吊命 陳茂波咪側側膊

呢幾個月社會立立亂，飲食業係重災區之一，嗌晒救命。事關市民都唔敢出街食嘢，試問啲食肆又點會好生意吖！立法會飲食界議員張宇人就話業主減租唔理想，再加上市民消費意欲疲弱，建議政府補貼食肆嘅水電煤。老實講，依家已經好多酒樓同茶餐廳捱唔住執咗笠，若果財政司司長陳茂波仲側側膊，對餐飲業嘅苦況視而不見，唔肯幫吓佢哋，睇怕會出現失業大軍，而喺深層次問題未解決下，又添民怨。