政情：蕭偉強愛集郵 欣賞年輕才俊

以前都唔覺佢有呢樣愛好喎，咁佢向邊啲人埋手「集郵」呢？蕭偉強未做問責官員前係做復康專員，好關心弱勢社群，就算離開咗官場，都時不時參與相關嘅活動，話說日前佢去咗心光盲人院暨學校《有作為》（Project Works） 計劃嘅企業及社區夥伴聚會中，特意向兩位視障年輕才俊「集郵」，之後仲喺Facebook上載集郵相，介紹兩位年輕才俊添。

讚積極助視障人士就業

蕭偉強話，其中一個叫Shirley，係計劃嘅項目主任，話佢大學畢業後喺心光呢幾年，一直充滿熱誠咁協助視障人士就業，佢嘅陽光笑容、積極嘅態度同堅毅嘅性格，令人印象深刻，仲話仍然好回味年幾前，Shirley親自下廚款待佢嘅豐富晚餐。

另一位係Walter，都係大學畢業生，蕭偉強形容對方嘅語言同組織能力好突出，寧捨棄跨國公司穩定職業，毅然創業，致力協助高學歷嘅殘疾人士搵到同能力相稱嘅工作，幾年間跨過唔少難關咁話！