政情：內會主席選唔到 法案隨時直送大會二讀

梁美芬鬧爆泛民「唔知講緊乜」

泛民尋日喺內會拉布嘅內容愈扯愈遠，郭家麒發言講成十一分鐘，大談認證議員學歷資格等等。梁繼昌就談及內會依家職能有限，只係負責安排大會議程嘅先後次序，希望候選人計劃擴大職能範圍云云。梁美芬忍唔住鬧爆負責主持會議嘅郭榮鏗，冇為發言設時限，又批評泛民冇內容同遊花園，「根本我都唔知你哋（泛民）講緊乜」。

議員陳健波都鬧埋一份，話開咗三次會、成十一個鐘都未進入選舉論壇，仲講起話立法會主席梁君彥依家全日主持會議，所以設半個鐘小休，「唔知將來大主席使唔使一個鐘頭去廁所」。郭榮鏗就話相信梁君彥身體非常健康，唔使每半個鐘就去廁所，又話唔會設時限，因為會惹來議員反對，更無助進程喎。

拉布內容係點都好啦，總之內會選唔到主席，有議會中人就話，政府法案若要有法案委員會，就透過內會成立，既然未選主席，咁就有排才有機會成立到，受影響嘅包括俗稱「空置稅」嘅《2019年差餉（修訂）條例草案》，好彩依家喺禁蒙面法以外暫未有太大爭議嘅附屬法例，否則「先訂立、後審議」嘅附例有時限，若要喺內會成立小組委員會審議嘅話，真係唔等得咁耐。

審議空置稅倘受阻 恐從頭嚟過

既然依家已經係今屆立法會嘅最後一年，若審議空置稅有咩阻滯，明年都通過唔到就要從頭開始。有建制話，泛民咁拖落去，最終只會逼到政府同梁君彥有藉口，喺必要時將啲法案直接放上立法會大會恢復二讀，就好似修訂《逃犯條例》原本嘅計劃咁。

唔通泛民真係覺得法案委員會唔重要？聽落又唔似，有泛民就表明，每條法案都應該經由法案委員會審議，反指依家係政治問題，政府應該同民主派梳理內會問題咁話。

不過講到底，空置稅講咗咁耐都未通過，市場知道隨時立法，都嚇到加緊推出積壓嘅單位，其實出口術都已經有效果啦！