政情：網上評論惹爭議 黃傑龍否認消費死者吸生意
十五歲青年學院女學生失蹤後浮屍海面疑團未解，而稻苗學會會長黃傑龍日前亦喺Facebook貼文話呢件事應該要調查清楚，隨即惹起網上爭論，本身做食肆生意嘅佢否認出貼係消費死者同吸引多啲生意，強調自己冇咁賤。
黃傑龍喺貼文話「一位15歲少女如此神秘的死於非命，好應該認真調查清楚，甚至開死因庭找出真相。」呢番言論惹起網上爭論，有網友建議佢都係低調啲，少啲出咁有話題性嘅post，以免慢慢引起反感同埋激起不必要嘅矛盾；另有網友就話佢呢單事件其實係想食正個輿論，爭取多啲人好感。好明白做生意嘅梗係邊度有利益就跟邊度啦，不過太進取想爭取好感，可能物極必反。
強調「我唔係窮成咁」
黃傑龍之後再貼文，話睇咗一晚網友嘅評論後，有朋友提醒佢咁樣會傷害家屬感情，而佢亦明白，如果搞到有咁嘅效果唔係佢嘅原意，感到非常抱歉，仲話嗰日學校公開播放CCTV片段嘅錯誤同拙劣手法完全係令事情急速惡化嘅主因，令人懷疑。
至於被質疑出貼為生意同利益，佢話有人覺得佢寫呢啲係為咗消費死者、吸引多啲生意，強調「我唔係窮成咁，更加沒有賤成咁。」唔知佢呢啲補充，係咪可以平息網友嘅疑慮呢？