政情：建造業八仙嶺 陳家駒讚天下無敵
建造業議會經常都會推出改善建造業運作嘅措施，主席陳家駒尋日就喺網頁撰寫題為《天下無敵》嘅文章，內容提到香港雖然好逼，但就有唔少郊野公園，仲特別提到八仙嶺，大讚八仙嶺係一幅巨型山水畫，當中嘅仙姑峰、湘子峰、采和峰、曹舅峰、拐李峰、果老峰、鍾離峰同最高嘅純陽峰，就好似神話中嘅八仙守護香港。原來建造業界都有自己嘅「八仙嶺」，究竟係咩呢？
指8項改善業內運作嘅措施
建造業界嘅「八仙嶺」，講緊嘅其實係業內認為建造業議會推出嘅最具影響力嘅八項改善業內運作措施，包括推動建築工業化、數碼化、應用創新技術、學徒計劃、推動建造業部分工友月薪制等。陳仲形容，每項工作都有剛有柔、有人有物、有遠有近，就好似八位神仙一樣，各有神功，聯合起嚟就法力無邊咁話。
陳就講到如果八個項目全部成功落實，香港建造業就天下無敵。之但係最近經濟下滑影響建造業生計，十五個建造業工種都全面凍薪，前景咁唔樂觀，呢個「建造業八仙嶺」仲係咪可以發揮效用呢？