政情：容海恩議辦遭破壞 葉劉斥喪盡天良
為咗反對修訂《逃犯條例》，網民發起到各區嘅大型商場聚集，最後大多演變成衝突，示威者喺各個地方大肆破壞，而新民黨位於鰂魚涌、大圍、上水同大埔區嘅辦事處都受到惡意破壞，該黨立法會議員容海恩（Eunice）位於大埔榮暉商場嘅辦事處亦都被衝擊，佢尋日就喺社交網站上載咗段分半鐘嘅片，同該黨主席葉劉淑儀去現場實地視察。
怕嚇親附近居民
片段見到，辦事處大門成幅玻璃牆碎裂，碎片散布地上，內裏一片凌亂，石頭都飛埋入去，仲見到電視機屏幕都爆埋，辦事處內嘅電腦及保安系統亦都要報銷，Eunice之後仲話翻睇閉路電視，見到有八至十名黑衣人聲勢浩蕩咁破壞，而對面正正係補習社，當時又係營業時間，加上辦事處樓上又有人住，咁樣真係會嚇親同危及附近居民，而葉劉更加話係喪盡天良，佢哋都話一定要遏止呢啲暴力行為。
