中環出更：揀領袖人才 倪以理話要識抗逆
點樣迎合世界轉變以持續經營，係今日好多企業所面對嘅重大課題。社會企業「鑽的」董事、資深金融同投資專家倪以理話曾經有一個統計，指喺一九三五年，一間企業躋身於標普五百嘅時間可以長達九十年，但去到一五年就縮減至十年，可見隨着社會嘅演變，百年老店買少見少，企業點樣與時俱進奮發圖存，就需要領袖人才去指引路向。
倪以理尋日應金紫荊女企業家協會嘅邀請，分享現今企業所面臨嘅挑戰。佢話一般傳統企業嘅架構，多數採用上窄下闊嘅層級式管理，務求員工按部就班，以最高效率去達至短期目標，喺變化唔大嘅時代，管理人才的確可令企業精益求精，但現今社會因科技演進而急速變化，企業要敏捷回應，團隊式管理就比較適宜，然而如何達至企業內每個團隊各自運作但又互相配合，領袖嘅素質就係關鍵。
鄺紫凌指層級式管理有必要
佢話優秀嘅企業領袖，唔單止要為企業提出轉型嘅方向，亦要想出新方法取代舊模式，懂得作出取捨同忍受陣痛，帶領企業上下放眼於美好將來，因此要培養領袖人才，較培養管理人才要難得多。雖然世上並無劃一嘅領袖育成方法，但佢認為年年考第一嘅高材生，成長過程順利，難免過於自負唔夠謙卑，未必係理想嘅領袖人才，反而嘗過逆境嘅人，更能帶領企業邁向變幻莫測嘅未來世界。
金紫荊女企業家協會主席林淑怡、常務副主席鄺紫凌同執行委員林玉茵都在座。鄺紫凌經營嘅鞋履企業已經有三十多年，近年都開始採用團隊式管理，不過就只限於採購同船務等少數部門，佢話鞋履生產採用流水作業嘅運作方式，層級式管理還是有其必要。
菁英會會員麥立菁係初創公司董事，業務係研發產品成分評測嘅應用程式。佢話公司規模細小只得十二人，但仍能發揮互相配合嘅團隊精神，有賴大家都認同憑科技促進大眾健康嘅公司文化。
卓妮