中環出更：鄉議局就職禮 一度考慮唔請村代表
近期香港多處出現示威，某啲地方容易成為目標被破壞，好似位於沙田嘅新界鄉議局大樓就喺上星期成為目標，據悉破壞唔算太嚴重，但令到鄉議局要重新考慮聽日舉行嘅就職典禮安排喇！
鄉議局每年都會舉行十‧一酒會，今年就同就職典禮一齊用晚會形式喺聽日舉行。雖然大樓上星期遭到破壞，但聽聞受影響範圍有限，好似地下玻璃門被打爛，牆身有少許塗鴉，預料唔會影響到晚會。
聽聞有官員唔敢出席
不過，因應大樓情況同埋社會氣氛，據聞鄉議局就晚會安排多作討論，好似有考慮過改作閉門、限制網媒採訪等，亦有諗住縮減規模喺邀請人選上作刪減。以往鄉議局活動邀請多名問責官員到場，聽聞今次有官員唔敢到，就連唔邀請村代表都係選項之一，但最終就覺得呢個做法唔妥當而未有採納，但現時社會情況日日轉變，最終安排仍未有定案。
講真，村代表為各鄉事委員會主席嘅選民，唔畀佢哋參與就職典禮真係唔多講得通，亦都理解作為主辦單位要控制好風險，希望到時容許多啲人參加喇！
卓妮