政情：減磅幫港鐵撲火 歐陽伯權提早離任嶺大

歐陽伯權二○一四年獲委任為嶺南大學校董會主席，並於一七年十月續任，任期為三年，即係原本應該要到二○年十月先至任期屆滿，但尋日佢就突然離任，比原本離任時間足足提早咗一年。由於歐陽伯權提早「離座」，政府就話，將會展開物色繼任人程序，以望早日能夠搵到合適人選，以委任下一任嶺大校董會主席。而喺呢段期間，現任嘅嶺大校董會副主席葉成慶就會署理主席職務。

辭校董會主席 各方尊重決定

教育局局長楊潤雄就話，對於歐陽伯權提早離任感到可惜，但都尊重其決定，仲話喺歐陽出色嘅領導下，嶺大繼續秉承博雅教育嘅優良傳統，積極推行優質全人教育，致力為社會培育兼具卓越才能同人文視野嘅人才，十分感謝歐陽對嶺大所作嘅貢獻咁話。至於嶺大亦都話對歐陽提早離任深感惋惜，但都尊重佢嘅決定，仲祝佢往後一切順利及成功添。

其實又難怪歐陽伯權會提早離任嶺大校董會主席職務，事關佢今年七月接任港鐵主席之後，港鐵就火頭處處。政府修例風波引發七月廿一日元朗站內白衫軍無差別追打市民事件，港鐵處理手法惹人質疑，自此港鐵就陷入政治漩渦，屢成黑衣示威者攻擊目標，對港鐵站嘅破壞可以話係肆無忌憚、愈來愈激，近日多個港鐵站仲要關閉暫停服務，普羅市民生活大受影響。

車站屢遭破壞 列車頻頻出軌

另一邊廂，港鐵自今年三月發生通車四十年來首度列車相撞事故，一列車廂被撞「劏肚」致扭曲變形出軌後，港鐵就頻頻發生出軌事故，包括今年七月東鐵線大學站與大埔墟站之間，工程車進行更換路軌工程時於彎位出軌，以及上個月嘅紅磡站，同埋本周日荔景站至美孚站之間都分別有載客列車出軌，真係衰開有條路，頻密過藝人「出軌」。歐陽伯權真係要專注諗計，幫港鐵重回正軌至得喇。