政情：李汝大招積談讀書 第一名一定係我攞
讀書成績唔止靠勤力，有時都好講天分。尋日喺一個大學招生活動上見到斐濟駐香港名譽領事李汝大，佢就話自己以前讀書時，同學仔都會估考第二同第三名嘅係邊個，但就唔會估第一名花落誰家。究竟點解呢？佢就話，因為第一名一定係佢攞，所以冇人會估喎，真係招積！
天生記性好 半供讀養家
被問到覺得佢細個讀書同依家讀書情況有咩唔同時，李汝大就話當然有多少改變，但唯一冇變嘅係壓力一樣咁大。佢又透露，自己細個時家境本來算唔錯，但自從爸爸過身後，媽媽含辛茹苦養大佢兩兄弟，因為佢做大哥，責任較大，所以都有半供讀，一路讀書一路賺錢畀屋企。
佢又話，幸好自己天生記性好，畀佢考入英文中學，再入埋大學修讀歷史。佢又話自己讀書時都名列前茅，所以由中學到大學畢業年年都攞獎學金，唔使媽媽出一分一毫學費。而佢亦都因自己嘅狀元成績，讀書時已好多人搵佢補習同兼職喺學校教書，人工仲比一般兼職高，唔止可以幫補家計，仲供到細佬讀大學，認真犀利。