中環出更：議員一早呻唔夠用 立會終增哺集乳室
立法會議員容海恩今年初誕下女兒，喺佢女兒出世前，早已有女議員指出立法會大樓內當時只得一個哺乳室係唔夠用，應該喺其他樓層都增設哺乳室。事隔超過一年，立法會秘書處尋日先至通知，過往地下原有嘅幼兒護理室已完成改裝，可作為哺集乳室，加埋大樓內原有嘅母乳餵哺室，大樓內就有兩個哺集乳室喇，真係等到嬰兒都隨時戒埋奶喇。
傷健洗手間有換尿片設施
立法會原本只有一間母乳餵哺室，成幢大樓咁多女士，難怪有女議員呻唔夠。依家新增設嘅其中一間哺集乳室設於兒童學習室附近，內設兩個固定間隔，可供兩名使用者同時使用。另一哺集乳室就鄰近大樓地下嘅傷健人士洗手間，每次可容納一名使用者，即同一時間最多可供三位媽媽使用。不過，都係只有持有效大樓通行證嘅女性先可以憑證進入咋。
咁如果男士有需要照顧BB咁點算呢？秘書處就話，哺集乳室隔籬嘅傷健人士洗手間內都有畀嬰兒換尿片嘅設施，爸爸們要照顧小朋友都可以使用喎。等咗咁耐先增加多一間哺集乳室，而且仲唔係議員所建議嘅唔同樓層都有，睇嚟爭取「媽媽友善」政策真係唔容易喇。
卓妮