政情：馮英倫老婆 澳門買樓畀家人
買樓唔單止睇升價潛力，屋企因素都好重要，尤其好多人選址都鍾意近家人。好似發展局局長政治助理馮英倫（Allen）就喺上月底申報，增持一個由太太全資持有位於澳門望廈區嘅住宅單位，作自住之用，佢回覆查詢時就話，太太買呢個單位，正正就係同家人有關。
佢喺上月廿六日申報，增持呢個澳門嘅單位。佢話，太太本身係澳門人，依家同自己一齊住喺香港，買呢個單位係畀岳父岳母住，因為嗰邊比較近太岳母屋企，方便照顧，而太岳母已經九十幾歲嘞，整體身體都OK嘅。咁又係嘅，老人家年紀大，多個人住近啲睇住都係好事。
囝囝見到人就笑
Allen剛為人父不久，佢講起，囝囝已經四個半月大嘞，大約一個月會帶埋囝囝去澳門探太太嘅家人一次，依家囝囝都幾乖，見到人就鍾意笑，只係眼瞓嘅時候就會扭計咁話。