中環出更：小吉偕友復活節潮玩杜拜
話咁快又到復活節，唔少名人開始籌備旅遊大計。卓妮尋日喺沙田馬場遇到一身豹紋淑女打扮嘅健康快車創會主席方黃吉雯（小吉），佢話好難得約齊十幾個馬主朋友，計劃喺下個月復活節假期同遊杜拜，享受極盡奢華嘅新潮玩樂設施。
陳正欣新西蘭自駕遊
從事鐘錶業嘅陳正欣（Daniel）都有入馬場，撐自己有份嘅團體馬「金獅威將」，雖然只係跑第二，但都瓜分近四十萬元獎金。Daniel開心話，嚟緊打算去新西蘭接收新馬匹，順便同家人自駕遊逍遙一番。佢話好享受自駕遊，尤其係去瑞士公幹，必定自己揸車，飽覽風光之餘又可減壓。
「快勞夾大王」杜振源夫婦（Simon）亦現身馬場，佢哋話平日去得太多旅行，復活節反而想留港，一家人共享天倫。Simon年前娶新抱，但就未有孫抱，所以佢希望囝囝努力造人喎。
卓妮仲見到前東區區議會主席丁毓珠，手持深藍色Chanel手袋同老友入場湊熱鬧。創立名校維多利亞幼稚園嘅珠姐，已經退居幕後做校監，由囡囡孔美琪擔任校長。不過，珠姐好鍾意小朋友，每年都親自帶學生到處遊樂，之前分別去過北京、日本，今年暑假會去台南，同學生一齊體驗農莊生活。
卓妮