政情：建制派晤政府高層 怒鬧部門卸責

陳健波拍片 大爆會面情況

今年立法會放咗一個悠長暑假，不但因立法會大樓遭攻陷而提早兩星期休會，現時連幾時復會都未有定案。不過假期長咗唔代表抖多咗，好似波哥呢段時間就頻頻拍片論政，十足十KOL一樣。佢尋日又有新片發布，大講上周五同政府會面嘅情況，揭示咗建制派兜口兜面鬧政府喇！

波哥拍片交代當日會面，提及好多議員都批評政府多個部門各自為政、推卸責任，不但無嚴正執法，仲阻撓執法部門執法，話對此感到憤慨，要盡快恢復市民對政府有能力執法嘅信心喎。

另外，波哥又提到依家好多市民唔敢表達意見，皆因擔心會遭到私刑對待或者被起底，仲話香港搞到立立亂，但政府部門竟然欺善怕惡，只顧置身事外，直言呢種部門之間無互相配合嘅文化，會助長惡勢力變得愈嚟愈猖狂，長久香港一定無運行囉。

波哥拍完片都唔夠喉，仲要留言繼續話好多市民覺得執法不嚴同有人包庇，先會造就無法無天嘅惡霸，將個火頭由政府燒埋去示威者度。

轟示威者「打着民主反民主」

佢批評示威者恃住人多蝦人少，意見唔同就拳打腳踢，係「打着民主反民主」，強調民主要尊重意見，而非似恐怖分子打罵相反意見人士。

但呢番言論引嚟兩派網民熱議，有網民大表認同，仲列出要清算嘅部門，好似有教育局、食環署同香港電台等，但都有網民批評波哥歪理多，問佢點解要再製造仇恨，令社會更加撕裂。

現時社會氣氛對立，真係講乜嘢都會得罪人，但建制派有咁嘅睇法並非無道理，因為近月政府完全唔似團隊，好多部門都隱咗形，好似街道變晒做連儂牆，寫明「請勿張貼」，但食環署都闊佬懶理。仲有負責政府公關嘅政府新聞處，喺示威浪潮將邁向第三個月先交得出宣傳片，唔知建制派反映完意見後，政府吸收到幾多再付諸實行呢？