中環出更:過渡房屋一味拖 議員對研討會冇期望

運輸及房屋局副局長蘇偉文邀請全體議員喺十一月頭去開「同行.共創 過渡性房屋」研討會,但有議員就話對研討會期望唔大,本身七月話批二十億元去起過渡性房屋,點知開唔成會,到依家先嚟搞首次研討會,都唔知要傾到幾時,睇怕要下年四月先會批到錢o架啦!

立法會房屋事務委員會主席柯創盛話本身希望三年內可以起到一萬個過渡性房屋單位,但依家連起五千個都做唔到,認為進度太慢。佢覺得政府應該壓縮行政程序,做好前期工作,預先搵定心儀地皮,早啲做好配對咪可以直接拎錢囉!

冀政府由「促進者」變「倡議者」

佢又話政府要由一個「促進者」變成「倡議者」,主動啲,好似當年起石硤尾臨時房屋咁。佢仲話希望有更高級嘅官員嚟同佢哋開會,特首既然都話房屋問題係「重中之重」,就最好派埋司長落嚟,咁先表現到解決問題嘅決心o架嘛!

副主席尹兆堅直言對研討會無太大期望,覺得都係一個「吹水會」,因為過渡性房屋嘅方向已經好清晰,係爭在政府承擔番責任,拎番個主導權去收番啲丟空咗嘅土地。佢又話依家先嚟開第一次研討會,之後應該仲有兩三個。佢估計應該要到下年三、四月,成年後先會批到撥款,又話政府淨係得把口講點樣重視房屋問題,但個個部門都山頭主義,根本唔將房屋饑荒問題擺喺第一位。

卓妮

第一手消息請下載on.cc東網iPhone/iPad/Android/Windows Phone Apps