中環出更：面對憂患愁悶揪心 周樹堂介紹用沉香

周樹堂日前喺一個講座中話矜貴嘅沉香，其實係沉香樹受到損傷而分泌嘅樹脂，但其擴散同凝結嘅過程非常緩慢，歲月流逝半世紀都只得拳頭嘅大小，而沉香嘅極品就稱為「棋楠」。佢話雖然棋楠二字源於梵文「漂亮的黑」，然而黑色嘅棋楠，反而唔及得白、青、黃等顏色咁珍貴同罕有，儘管中國嘅沉香文化始於春秋盛於唐宋，可惜去到近代就淡出國人之視野，直至十多年前先至重拾沉香於華夏文化中嘅地位，但又礙於過度採伐同城市開發，加上香農都不願子弟繼續靠艱辛採掘謀生，都導致今日沉香嘅供應極少，而佢手上嘅沉香，十年升值逾百倍。

佢又話唔同產地嘅沉香各有特色，但佢認為產自海南島嘅沉香質素最佳，但可惜海南島沉香幾近絕迹。雖然內地開闢多個「沉香園」以應付需求，然而人工種植而得嘅沉香，同天然沉香相比猶如泥雲之別，難以解決目前天然沉香奇貨可居嘅局面。

董吳玲玲（中）、周妙儀（右）及其妯娌張吉紅（左），都覺得沉香嘅氣味高雅清幽。

張鍾麗裳（左）對收藏沉香甚感興趣，右為佢嘅姨甥劉偉奇。

唐卓敏：係低調奢侈品

當日周樹堂家姐周妙儀亦在座，而出席講座嘅嘉賓、香港收藏家協會會長唐卓敏認為沉香同一般耀目嘅珠寶玉石唔同，因為前者係一種低調嘅奢侈品，收藏沉香除咗講求價值，亦反映物主嘅個人品味同文化底蘊。中華文物收藏家協會副會長張鍾麗裳就話處理沉香雕塑，難免會出現一啲碎料，但佢都會妥為保留以製成耳環或吊飾，物盡其用先至唔會辜負咁難得嘅大地瑰寶。

卓妮