中環出更：小朋友正能量感染 陳黎惠蓮重拾笑臉
人嘅心情就好似天氣一樣，時好時壞，但就算幾差都好，總會有雨過天青嘅一日。保良局副主席陳黎惠蓮日前喺一個慈善活動話，有次去小學做義工項目嘅時候心情麻麻地，但反而畀班天真無邪嘅小朋友嘅正能量感染同帶動咗，心情頓時變得開朗，令佢覺得做呢啲活動，既可以幫到人，自己都有所得着。
轉頭見到保良局總理顧東華同湯振傑。顧東華話做慈善活動比較深刻嘅印象就係教小朋友賣旗，佢話唔少小朋友都稍為抗拒同陌生人接觸，開頭會無咁大膽，後來慢慢提醒佢哋主動行出第一步，成功氹到途人買旗嘅機會都大好多。佢又話幫人係一種福氣，受助嘅人同你有緣分先能夠畀你幫到，係一件值得開心嘅事。
唔單止賣旗，顧東華又會親自落場，參加局方一年一度係北潭涌舉行嘅慈善跑，佢唔介意賽事成績，最緊要係為慈善出一分力喎。
湯振傑就認為「施比受更有福」，樂於助人無法同其他物質上帶來嘅滿足感相比，佢記得有一年喺特殊學校嘅聯校畢業典禮入面，被學生嘅表演感動，因此佢亦特別提醒大家需要支持社會上嘅基層人士。
馬清楠盼運動幫特殊兒童增自信
唔單止搞慈善活動，保良局亦都同香港欖球總會推廣「欖球共融計劃」，保良局主席馬清楠話大家已經合作咗七年，希望特殊兒童同智力正常嘅小朋友透過運動，彼此打成一片，從而增強特殊兒童嘅自信心，畀佢哋知道自己都做到正常人做到嘅嘢，唔會有被歧視嘅感覺。
講開欖球，在場嘅勞工及福利局副局長徐英偉，幾乎每個禮拜日都會義教小朋友打欖球，佢仲大爆喺過程中學到點同小朋友溝通，培養耐性之餘，同時能夠紓緩工作壓力，而且每次上完堂之後，佢都會去小食店買好多嘢食同飲品畀小朋友揀，出錢又出力。
卓妮