中環出更：測量人才短缺 謝偉銓呻學額少難有新血
現時內地有唔少重大基建項目，需要大量從事測量嘅人才投身。但係立法會建築、測量、都市規劃及園境界議員謝偉銓（Tony），尋日話本港嘅人才都短缺，仲呻話因測量學額唔夠，希望政府可以增加學額，吸引人才報讀。
深圳前海深港現代服務業合作區管理局香港青年建築設計比賽尋日舉行啟動禮。本身係測量師嘅Tony話自己早年喺理工大學畢業後「半工讀」，一邊打工一邊進修，短短兩年就成功考獲牌照，但係有位師兄卻要用上六年時間先考到牌，相比之下自己算係比較好彩。佢認為「半工讀」嘅好處係能夠吸取更多實戰經驗，較大學畢業生考完牌先入行為優勝。
盼增學額 培育新進精英
依家香港係咪少咗人入行？佢解釋，由於本地大學着重研究嘅學術科目，所以忽略咗測量學，正正因為呢個原因，導致測量學額長期不足，「想讀都無得讀」，佢又話香港同有好多大型基建項目嘅前海市一樣，都好需要呢方面嘅新進精英，盼政府增加學額紓緩問題，吸引有志之士入讀課程。
同場嘅香港測量師學會前會長賴旭輝博士就話每年平均得百幾至二百個畢業生入行，人數唔夠政府、業界同私營機構分，佢都想政府增加學額，畀多啲機會人入行，培育更多測量人才。
卓妮