政情：曾智明請外援省靚品牌
呢個年代做生意少啲諗頭都唔得，好似被譽為「男人嘅世界」嘅金利來集團咁，第二代掌舵人曾智明（Ricky）都蠢蠢欲動，要承先啟後，為旗下嘅品牌搞搞新意思，省靚個招牌。Ricky尋日以副主席身份出席集團股東周年大會時透露，佢哋會分拆多一條走時尚風格嘅高級路線，仲專程喺法國聘請設計師來港打造新包裝，以全新形象示人。
不過，金利來發展至今有咁大規模，都多得一班忠實擁躉，所以Ricky話唔會放棄舊有顧客，亦唔會忽略年輕一代嘅新顧客。Ricky向來鍾意自己做模特兒演繹自家品牌，佢坦言仲未有「老闆」嘅肥胖身形，所以着起一啲靚質地恤衫時，腰位都有啲鬆動，但現時新設計剪裁會略為修身，所以令佢着起來比較啱身。
現時物價通脹好嚇人，Ricky就反而唔係好驚，事關佢年頭買咗幾百萬元貂鼠毛，轉頭已經升值，所以佢好鍾意做中國市場，因為利潤可以畀到佢哋發展空間喎。