政情：談預設醫療指示 徐德義憶起亡父
政府正就預設醫療指示立法進行三個月諮詢，食物及衞生局副局長徐德義尋日喺電台節目講起預設醫療指示時，自爆爸爸臨終前嘅情況。佢話，當時係十幾年前，爸爸有末期心臟衰竭氣喘，要用非侵入性呼吸機，爸爸臨終前，似乎因為呼吸機令佢好唔舒服，護士將呼吸機面罩拉緊，以防鬆脫，爸爸就忍唔住喝一聲，大力推開護士同面罩，面露不滿。
佢話，爸爸一直都好有主見，相信佢如果清醒時，已經明白自己嘅情況，就已經決定到究竟繼續用呼吸機，抑或喺安詳昏睡中離開。
現行制度下推廣有困難
佢認為，現時預設醫療指示唔係以立法方式推行，喺香港執行同推廣有一定困難，因為唔少長者、長期病患者、家屬同照顧者，對於預設醫療指示嘅理解都唔深，希望今次向公眾諮詢同建議立法，更能維護病人自主權，有尊嚴咁度過人生最後旅程咁話。