中環出更：李秀恒去孟加拉影濕婆節嚇到呆咗
好多人都鍾意去旅行，就好似香港中華廠商聯合會永遠名譽會長李秀恒咁，鍾意到唔同地方旅行攝影，佢早前舉行咗一個攝影展，展出佢喺孟加拉拍攝嘅相，佢話去拍攝濕婆節時，出席一個拜祭活動時，有幾名信眾被鈎勾住背脊凌空拜祭，佢當時見到都目瞪口呆，第一時間攞相機拍攝現場震撼畫面。
話說去到一個平民區，佢見到小朋友在街上執垃圾，一路拍攝時個心就一路痛，覺得小朋友應該要開心快樂生活的，所以佢拍攝完之後將身上所有金錢全部畀晒個小朋友。咁佢經常去旅行，攝影又買咁多相機，老婆有冇詐型？佢話老婆冇詐型，仲好支持佢，周不時仲做埋佢嘅特約Model添！
出席攝影展仲有香港表廠商會首席名譽會長林偉雄夫婦同香港睦群助更生協會主席何偉權（Ken）。問到林偉雄鍾唔鍾意影相？佢話讀書嘅時候有加入攝影班，仲用咗三四年時間儲咗成千蚊買咗部單鏡反光機，因為自己主修地理，所以經常去香港唔同嘅島嶼影相考察，咁依家仲有冇影相？佢就話依家都有影相，但係時代唔同，依家轉咗用手機影，因為科技先進，用手機影完，可以即刻send出去畀朋友一齊觀賞，方便好多。
何偉權鍾意唱歌寫書法
阿Ken就話唔識影相，興趣就係唱歌同寫書法，一有時間就去幫手做義工，表演唱歌。佢話唱歌同攝影一樣都可以留下好多開心回憶，至於寫書法就可以幫自己減壓平靜。咁老婆係咪佢嘅知音人？佢笑說話當然啦，有時大家仲會一齊合唱吓，真係聽到都恩愛。
卓妮