港人居住陷困境 長壽無奈添壓力

常言道,沒有安居,哪有樂業。家陣社會充滿戾氣,年輕人尤其暴躁,究其原因,置業難等上樓又難,難免對政府充滿怨氣!相信大家都記得有個被DQ嘅女議員,喺一個論壇突然爆出:就算我哋依家想去扑嘢,都搵唔到房去扑喇,呢個真係好現實嘅問題嚟o架。

的而且確,香港人唔快樂,好大原因都係居住問題。阿哥,邊個唔嚮往「人生不止眼前的苟且,還有詩與遠方」嘅理想生活吖。之但係現實話畀大家知,公屋輪候時間又創新高,平均輪候時間增到五點五年,點止等到頸都長咁簡單吖!

呢,有個調查指港人整體生活質素微跌,其中港人置業負擔比率指數更跌至歷年最低。負責調查嘅學者話喎,按推算,一個中等收入家庭,就算「唔飲、唔食、唔使」都要儲足超過十七年嘅錢,先有可能買到市區一個三百平方呎嘅單位,樓價貴到離譜,貴到脫離現實,由此可見一斑!

嗱,唔靠父幹嘅年輕人,根本連買一塊階磚嘅錢都畀唔起。功夫茶心諗,佢哋咁鍾意飛磚,大有可能係一種買唔起樓嘅發洩!好,撇開唔買樓,你估租樓又容易咩?有學者就話喇,工資加得慢過樓價,樓可以唔買,但樓唔可以唔租,唔少市民都攞收入嘅大半去租樓,租金一升,生活負擔就更重啦!

唉,港人住屋陷困境,好大程度係冇心冇肺冇靈魂政府,喺房屋政策上不思進取,一味「明日大嶼」,係咁煲冇米粥所致。功夫茶一諗起有成廿多萬人住喺劏房,家陣天文台周不時發出酷熱警告,天氣又悶又閉翳,點頂!曾有個調查指出,全港劏房戶人均居住面積僅得六十二點四平方呎,較一個七十五平方呎嘅獨立囚室更小。口痕友話:監獄唔單止包食宿,仲有糧出,踎監喺將來唔知會唔會成為「筍盤」呢?呢則調查充滿黑色幽默,卻道盡香港人住屋難嘅困境。

生活質素,認真講起嚟十分抽象,香港近年示威遊行、暴亂衝突不絕,唔使問阿貴,都知道市民對港府施政「冇咗信心」。調查指文化、休閒分類指數及環境分類指數,則升至有紀錄以來第二高嘅水平。功夫茶就唔多buy嘞,睇吓到處開花嘅「連儂牆」,搞到周圍環境烏煙瘴氣,你貼我撕,怒罵爭拗,拳來腳往,無日無之,社會以醜為美,有乜鬼文化休閒可言?

諷刺嘅係,港人面對生活質素下降,平均壽命竟上升到有史以來最高!功夫茶只能無奈嘆句:壽則多辱,香港人果然係硬骨頭!港府無能,港人只好自求多福,頂硬上啦喂!