中環出更：李曠怡追月夜擺婚宴 暗示老婆難追

Anita媽咪、東華前總理黃朱惠芬話，同Jason媽咪即係依家香港女童軍總會香港總監李周美枝，三十年前喺獅子會認識，當時兩個小朋友都有一齊玩，點知大個咗之後，Jason就去咗美國讀書，Anita就去咗加拿大，大家就分開冇再聯絡。

黃朱惠芬：千里姻緣一線牽

黃太話之後阿女帶男朋友見家長，先知道對方係Jason，大讚女婿夠乖仔，又覺得緣分真係好奇妙，感嘆真係「千里姻緣一線牽」！

黃金富（左）同黃朱惠芬（中）都大讚女婿夠乖仔，右係東華前主席孫秉樞。

蕭嘉怡（左）到場恭賀一對新人，李仲怡（右）則擔任婚禮兄弟團。

佢又話同東華真係好有緣分，事關老公黃金富都做咗七年東華總理，但係就因為太忙，畀咗佢接手，佢仲話做總理嘅時候，親家李三元就喺董事會做主席添！

卓妮見到政務司司長政治助理蕭嘉怡同李曠怡細佬李仲怡都在場，Jason爸爸、東華前主席李三元更加係笑容滿面，問佢係咪等呢日等咗好耐，佢就話完全冇喎，仲話仔大仔世界，自己從來冇催促過佢哋，話都係成年人自己識諗，唔需要人哋決定咁話喎。至於抱孫都係一樣喇，話唔畀壓力佢哋。問到畀新抱幾分，佢就諗都冇諗話Jason娶得梗係畀一百分喇！

李三元仲話Jason婚後會搬出去住，留低咗一對貓狗畀佢照顧，佢話由細養到大，其中狗仔年紀已經好大，唔想佢去適應新環境。佢又提到今年四月民政事務局特別委任佢返東華做顧問，一做就要做三年，真係始終都係東華人，兜兜轉轉都走唔甩。

卓妮