中環出更：無懼經濟陰霾 梁偉峯：發展「新零售」打好業務基礎
零售業唔單止要打開店門等待顧客光臨，亦可善用資訊科技，將商品銷售直抵顧客家門。理工大學專業進修學院課程總監及講師梁偉峯博士，指現時經濟雖陰霾密布，但鑑於香港嘅智能手機滲透率全球第一，業界大可藉此時刻整合業務，物色科技夥伴發展「新零售」，為日後嘅業務拓展打好基礎。
品牌發展局尋日舉辦咗一個研討會，出席嘅仲有工業貿易署高級政務主任馬念恩、畢馬威諮詢（香港）有限公司合夥人王建樑等。梁偉峯話要發展新零售，必須要懂得建立品牌、揀選一個簡單易記嘅網站域名、結合社交媒體同善用流動網絡等諸多條件外，亦要設法取得消費者嘅數據，以便於分析繼而優化銷售策略。儘管零售業界都好渴望從消費者身上獲取數據，然而消費者通常都不願透露。若果有辦法令到客人同意業界喺合法同受監管之下收集數據，咁新零售嘅發展就可望更上層樓。
黃啟綱用4年建立字庫
新零售好注重同消費者嘅溝通同交流，從事產品開發嘅黃啟綱就為本地商界研發聊天機械人，以擔任客戶服務嘅工作。佢話香港人講說話不但以廣東話為主，還要中英夾雜，所以佢同研發團隊花咗四年時間建立字庫，聊天機械人先至可以同港人消費者溝通。家具連鎖店負責人梁兆邦舊年開設新零售概念店，唔單止採用聊天機械人擔任客服工作，仲接受客人以虛擬貨幣付款，緊貼科技潮流。
品牌發展局副主席吳清煥就話近兩、三個月暴力場面不斷，導致遊客裹足，本地人消費意欲不振，從事零售嘅朋友慨嘆生意銳減近半。佢話同網上購物有關嘅新零售多屬年輕人嘅消費模式，中老年人還是傾向逛街購物。佢認為新零售雖則係一個發展方向，但盡早平息亂局，至係零售業救亡嘅最好方法。
卓妮