中環出更：林卓廷當街被粗言辱罵

片中見到林卓廷同一名外籍人士交談，而兩人面前有一部攝影機，似乎進行緊拍攝工作。而片中就有一把女人聲追住林卓廷嚟鬧，呢位女士未曾喺片中露過面，相信佢就係拍攝者，喺條街度追住林卓廷嚟鬧囉！

「不知所謂 影衰晒香港人」

片段長兩分半鐘，呢位女士不斷批評林卓廷不知所謂、離晒譜、失禮同影衰晒香港人，但為咩咁鬧就不得而知。另外，佢又鬧林卓廷冇忽似中國人，叫佢唔好用淘寶，全身唔好着中國嘢喎，終於令到林卓廷出聲話「我冇淘寶」。

不過，呢位女士相當好火，大鬧林卓廷嘅薪金由納稅人支付，「我哋出糧畀你」，又叫林卓廷唔好飲水同沖涼，因為所用嘅水來自內地喎。林卓廷當然反駁指係畀錢買水，但就ＫＯ唔到呢位女士，反被指有骨氣就應該唔好用，仲話成條村畀林卓廷影衰晒，鬧佢「×街嚟屋o架」。

林卓廷接受查詢時話事件喺尋日發生，當時正喺太子街頭接受外媒訪問，又話嗰位女士熟讀佢資料，因佢細過確住過元朗。咁佢平日多唔多喺街畀人鬧？佢就話讚同鬧都有遇過。其實白鴿黨當街被鬧非稀奇，好似該黨創黨主席李柱銘上月都試過當街被鬧漢奸走狗。

卓妮