政情：有兩個囡囡錫 楊大偉：Daddy的浪漫
女兒係爸爸嘅前世情人，推廣素食嘅社企Green Money創辦人楊大偉（David）日前喺社交網站上載咗一張佢生日時兩個女兒錫佢嘅照片，見到都甜蜜，難怪佢都形容呢個係「Daddy（爸爸）的浪漫」。有網友亦都留言，祝佢「前世（情人）今生浪漫！」添。
David有女兒錫，又有網友祝佢生日快樂，當然好開心，佢都有留言多謝大家嘅祝福。至於生日願望係乜嘢？當然都係同素食有關，佢就話希望有更多種素食，大家食得健康啲、環保啲同型啲，要全地球加油咁話。
下屬送「大偉牆」做禮物
最近好多地區都有市民表達訴求嘅「連儂牆」，David員工就整咗一幅「大偉牆」畀佢做生日禮物。「大偉牆」亦都貼滿便利貼，上面寫滿讚賞呢個老闆嘅說話，牆中央仲貼咗David化身超人嘅卡通圖像，睇嚟班下屬當咗佢係超人喇。