探射燈：派傳單都照着 伍婉婷爭取「長衫常服化」
鍾愛長衫嘅灣仔區議員伍婉婷（Yolanda）出席公開活動時經常都着長衫示人，佢日前就喺社交網站上載咗幾張着住長衫影嘅相，不過相中嘅佢並唔係出席活動，而係落區派傳單。天氣炎熱，區議員落區仲不時要擔擔抬抬，真係見到都覺得辛苦呀。不過Yolanda就冇有怕，仲話要「長衫常服化」咁話。
伍：街坊好易認到我
Yolanda話其實佢依家家訪，處理個案，到法團開會等，只要係工作場合都會以長衫示人，如果遇上要搬搬抬抬，就會着啲質料有彈性、鬆身嘅長衫。街坊見到佢着長衫都幾鍾意，佢同街坊亦因為長衫而多咗話題，仲有街坊話好易認到佢添。
不過Yolanda就話都試過着長衫甩轆，有次佢出席表妹婚禮時着長衫，攬住表妹影相時，長衫鈕扣就鬆開咗，好彩有條大披肩遮住冇走光。佢笑言自此之後做長衫都會改成較穩陣嘅花鈕或拉鏈，咁就唔使擔心喇。