政情：冇唱歌追女仔 鄭慕智：呢樣最失敗

Moses講起唱歌，話開始時係得到老師啟發，曾經都有學過唱歌，但只係好短時間，多數都係靠自學，自己買啲錄音帶同唱歌書返嚟，一路睇、一路唱。佢仲話，讀書時參加過好多場歌劇表演，直言︰「唱歌已經成為咗我生活嘅一部分」唔可以分開咁話，就連上到大學讀書，點辛苦都冇放低過喎。

自言老婆都鍾意聽

佢又話，後來出嚟做嘢時，好多時朋友都邀請佢唱歌，所以唱歌都係佢公餘時間最好嘅活動。問到讀書時有冇用唱歌嚟追女仔，佢就笑笑口話冇，仲自嘲呢樣嘢係佢最唔成功嘅。不過佢就話，佢老婆都鍾意聽佢唱歌，只係唔係唱歌追番嚟。