中環出更：細個有玩具樣辦玩 林凱章：朋友都好羨慕
今時今日香港創業可以好簡單，但要維持到落去，甚至推廣到個個都識就唔係咁易。立法會議員林健鋒家族生意係製造玩具，佢兒子林凱章尋日出席活動時講起，細個時爸爸偶爾都會拎啲玩具樣辦返屋企畀佢玩，佢都會同朋友仔一齊分享，唔少朋友仔都好羨慕佢。不過佢就話，依家做生意好多時都要簽保密協議，所以啲產品都唔可以「事前流出」喇。
林凱章話，依家只有自己品牌先會送出去「試水溫」，如果反應唔好，就無謂大量生產。佢又認為，如果想打造一個好嘅品牌，一定要有熱情同熟悉自己嘅產品，所以好多時都需要率先試玩，一定要試過，睇吓有冇潛力先決定生產。
講番個活動，其實喺香港地品牌大獎嘅頒獎禮，活動籌委會主席謝嘉恩、菁英會主席莊家彬都有出席。其中莊就講起佢家族公司係由爺爺創立，到佢爸爸接手時一度搵設計師改咗公司商標，之後就真係多咗人記得公司。不過莊就話，打造品牌單靠商標並唔足夠，產品同定位都好重要，而幾樣元素互有關連，例如定位係年輕化，商標就要設計得年輕一啲。不過近期市道比較差，都唔係做好自己就搞得掂，惟有勒緊褲頭捱下喇。
高松傑：創業最緊要有恒心
至於從事音樂教育嘅菁英會副秘書長高松傑就話，創立自己品牌最緊要係有心，又話時下創業較容易，但好多年輕人都「三分鐘熱度」，缺乏一個持續落去嘅心。佢嘅品牌已經創立十九年，無論係商標設計定課堂內容都擺咗好多心機落去，當年仲曾經因為商標設計問題而同拍檔鬧交添。經營一盤生意果然係唔容易喇。
卓妮