政情：收料站：港路太多渠蓋 辦F1有難度

Jeffrey話，新加坡每年都搞F1，要重鋪賽車級馬路，仲要搵地方興建維修站，連馬路邊嘅坑渠蓋都要逐個逐個用燒焊鎖死，以免車速太快時「片」起啲坑渠蓋，危及車手同觀眾。佢質疑香港有咁多坑渠蓋，到底有關部門肯唔肯配合呢？加上香港馬路多彎且窄，好可能只能舉辦三級方程式賽事，但咁做又會同隔籬澳門爭飯食，所以喺香港搞F1有一定難處囉。

林健鋒避輻射 唔去札幌

今年政圈咁多是非，Jeffrey本來打算暑假去北海道札幌休閒一下，點知有「高人」叫佢咪去，因為當地輻射指數上升咗少少，估計係吹北風關係，令福島輻射吹晒去北海道喎。至於呢個消息係咪真確，真係要測量過至知。