中環出更：郭榮鏗被投訴損業界聲譽 大律師公會跟進
警方之前購置咗俗稱「水炮車」嘅人群管理特別用途車，並於本月十二日安排立法會保安事務委員會委員參觀水炮車示範。當日警方示範水炮車時，委員之一嘅法律界立法會議員郭榮鏗（Dennis）曾經同在場嘅立法會議員何君堯爭執，期間Dennis指何係「黑社會」、「與黑社會有關」。近日有人就事件向香港大律師公會投訴Dennis，並指大律師公會已收到投訴，會交由該會紀律委員會跟進調查。
指摘郭言論構成誹謗
有關投訴來自一名自稱任教通識科嘅中學教師蘇子冠，佢喺本月中去信大律師公會投訴Dennis，指摘Dennis身為大律師，理應明白香港普通法入面「無罪推定原則」，但Dennis就公然喺冇任何證據下指何君堯係「黑社會」，甚至話何「指使黑社會做事」，有違大律師應有嘅法律水平。蘇強調當日係一個公開場合，亦有傳媒在場，認為Dennis嘅言論已構成誹謗，所以決定投訴。
蘇又批評，Dennis嘅言論損害大律師業界聲譽，冇資格繼續喺立法會中代表法律界，希望大律師公會跟進調查。而大律師公會就回覆話會交由紀律委員會跟進。我哋亦就此向Dennis查詢，不過至截稿前仍未有回覆。
卓妮