中環出更：政局動盪 暴力不休 梁卓偉：為港療傷需「善的力量」
元朗周日發生白衣人士追打市民事件，引來全城恐慌。已離開政府「熱廚房」多時嘅香港大學醫學院梁卓偉尋日發文提及事件，話社會需要「善的力量」，相反當權者執迷不悔，政客間謾罵、各方無休止暴力，令社會傷口變得更深，直指︰「這場政治風暴，必為香港留下深刻的烙印，但願這道疤痕記錄的，不僅是一場驚心動魄的衝突，還有我們對這小島的愛和堅持。」
嘆元朗安寧不再 令人痛心
梁卓偉提到，自己正飛往印度出席於新德里舉行嘅學術會議，但此時此刻同每位香港人一樣，腦海縈繞最近發生嘅片段。佢又話諗起細個每逢周末都會去元朗探佢爺爺，當年元朗青山綠水，今日新城鬧市卻遭受武力侵擾，安寧不再，令人痛心。
佢又話，港大早前已經警告香港已出現「精神健康疫症」，但今日情況唔止冇改善，仲急速惡化添。佢認為要令社會嘅傷口愈合，比醫生治病難得多，坦言社會需要依靠善的力量，不論係一首觸動心靈嘅歌、一句關心問候、一張寫滿祝福字句嘅便利貼或一個鼓勵眼神，都有助香港傷口早啲愈合咁話。
卓妮