政情：葉劉外憂內患失樁腳

譚領律前日喺社交網站貼文，話近期香港發生嘅連串事件，深感痛心，政府無意及無力解決紛爭，政黨立場有所限制，都對其信念和價值觀造成嚴重衝擊，佢又話放下政黨包袱後，會堅持十多年來服務社區嘅初心，繼續一心一意為民服務，形容未來嘅路難行，但「我的心卻輕省了」。佢回覆我哋時話，唔打算加入其他政黨。

黨內區議員減半

其實，近日修訂《逃犯條例》風波愈燒愈猛，葉劉已面對外界有聲音要求佢辭任行政會議成員，又再失去譚領律呢個「樁腳」，亦可見新民黨面對內患困擾，尤其該黨近年有多名區議員退黨，先有前副主席兼立法會議員田北辰聯同六名區議員喺一七年退黨，之後更另起爐灶，其後沙田區議員黃宇翰同林松茵、元朗區議員王威信同埋灣仔區議員李文龍亦先後退黨，再加上今次譚領律退黨，該黨目前只剩低十四名區議員，相比該黨高峰期嘅三十一名區議員，大幅減少一半。

葉劉稱該黨損失

葉劉回覆指，前日接獲譚通知，得知佢想退黨，二人傾咗好耐，知道譚受社工身份同教會背景影響，覺得政府表現好差，令社工界同教會有好大意見，佢明白譚好為難，尤其係近日發生嘅元朗事件，令到外界對於政府更失信心，變得負面咗，譚亦喺元朗事件後決定退黨，但雙方仍然係朋友，引述譚多謝新民黨一直以來對地區同政策嘅支持，又讚揚譚係優秀區議員，其退黨係該黨嘅損失。

被問到該黨係咪唔夠區議員提名取得俗稱「超級區議會」嘅區議會（第二）功能界別（下稱「超區」）「入場券」，葉劉話目前仍未決定係咪參選「超區」，若該黨最終派人出選，提名後仍需選民投票，因此必須尋求獨立議員支持，若出選相信會取得足夠提名咁話。