中環出更：賣珠寶要做埋和事老 劉克斌：搵咗女人錢幾十年

點解？劉克斌話因為大多數客人都喺女性，就連和事老都經常做，好多時情侶買結婚戒指，各有各意見爭持不下，佢通常都會向男方埋手，因為男最終都係要讓女嘅，好開心係次次都圓滿解決。佢仲透露經歷過幾次金舖打劫，賊人有刀有槍，幸好每次都冇人受傷。咁太太咪好擔心，有冇叫你唔好做？佢講笑話：「有叫我小心啲，但冇叫我唔好做，因為佢知道我仲要養佢！」

黃紹基緬甸買玉送愛妻

理事長黃紹基有收藏鑽石玉器，話最深刻係有次去緬甸做嘢時，見到有個玉石雕成一個圓形嘅玉，佢一見覺得好靚，所以第一時間就買咗送畀太太。點解吸引到你？佢話買玉係講緣分可遇不可求，加上粒玉係圓形代表（圓滿）嘅意思，所以決定買畀太太做禮物，真係廿四孝老公！

係咪會做嗰行厭嗰行呢？理事史敏華話唔會，因為自己都係鍾意先入行，一做就做咗二十幾年，自己都有收藏珠寶玉石，鍾意有唔同顏色，有時出去唔同場合可以襯衫，但佢話最大得着係客人嘅笑容，因為完成到客人提出嚟嘅要求，睇到佢哋開心自己會更開心。

黃紹基話買玉係可遇不可求。

鍾惠冰（左）同李慧（右）好積極投入會務。

同場仲見到副會務主任鍾惠冰同監事李慧，鍾惠冰話細細個就喜歡珠寶首飾，所以畢業後入咗呢行，仲話以前學嘢要買下午茶孝敬師傅先可以喺後邊睇，幸好自己係女仔有少少好待遇，如果唔係師傅唔會主動教你，日子耐咗自己開始設計繪畫首飾，第一次見到自己設計製成品出街時非常雀躍。

卓妮