政情：處男拔罐痛到叫 范國威認真失禮
經常都話病向淺中醫，一旦發現身體有病痛就應該趁未變嚴重前及早求醫。立法會議員范國威（Gary）喺議會經常衝擊，幾乎大部分狙擊行動都見到佢企喺最前線，原來上月唔覺意扭傷腰部肌肉，拖到尋日先去睇跌打，兼做咗「處男拔罐」，點知痛到佢大聲呻吟，認真失威！
Gary尋日喺社交網站發貼，話一直好忙無處理腰部扭傷，終於頂唔順去睇跌打，做完拔罐啲肌肉放鬆咗，下晝已經可以坐喺度工作，傍晚可以企直開街站嘞！問到情況如何？佢就話本來唔想睇跌打，平時因為怕痛連按摩都唔做，以為拉吓筋就搞掂，原來都係唔得。
打乞嗤都唔敢大力
佢又笑稱自己係「處男拔罐」，唔知應該點做，怕怕羞羞話喺跌打館內好失禮，因為痛到大聲叫，人人都聽到，唔知道嘅實以為佢呻吟喎，依家連打乞嗤都唔敢大力呀！睇真啲，相中Gary拔罐後嘅紅印幾乎變紫色，相信都要一段時間先可以完全排晒啲毒素嘞！