政情：屯門區會傾假難民 保安局冇影 議員嬲到震
假難民濫用免遣返聲請程序多年，遺禍香港各區，當中屯門都係重災區之一。多名屯門區議員早前聯署提出要喺區議會大會上商議有關問題，要求政府正視問題，點知尋日開會時保安局官員就完全冇影，淨係得個書面回覆，難怪提出嘅議員不滿。其中區議員古漢強更鬧爆保安局「怕咗人唔敢出席」，甚至形容政府淪陷。
「重複文件」當交數
古漢強話唔少市民向佢反映自己勤勞工作，但都只係賺得少少，相反好多外籍人士就連工都唔使返，暗批政府用公帑養佢哋。佢批評政府漠視區議會，仲話保安局只係「重複整份文件就算數」，事關之前區議會主席曾要求保安局出席，就算近日社會氣氛緊張，亦都「冇咩好驚」，直斥造成目前社會局面係政府嘅錯，反問政府係咪打算唔出席任何會議咁話。
究竟保安局嘅書面回覆講咗乜嘢呢？咪就係講咗入境處堵截非法入境者嘅部署等，話現有做法已有初步成效，嚟緊會繼續加強執法，同加快審核聲請同上訴等。聽落就好「例牌」，查實議員開會都有好多問題想問，只係提供一啲數據絕對唔足夠解答問題，今次見古漢強咁嬲，睇怕保安局下次都真係要派個官員嚟同佢哋傾傾先收到科喇！