政情：善用科技 堅持香港製造 張益麟無人銷售機賣衫
高昂嘅舖租同人工，令到唔少有意創業嘅人聞之卻步。不過，香港青年工業家協會副會長張益麟就認為，若果能夠善用科技，回應顧客嘅個性化需求，生意仍然係有得做。而佢近來就透過無人銷售機嚟販賣成衣，繼續發揚香港製造嘅精神。
減排兼省人手
張益麟話自己旗下嘅無人銷售機，概念上有啲似流動櫥窗，顧客既可於顯示屏上選擇衣物顏色，又可透過手機上傳自訂圖案，炮製獨一無二嘅個性化衣物。佢話呢種經營方法同傳統嘅成衣生產相比，就係前者嘅生意規模要較後者細，而迎合顧客個性化嘅直接生產模式，免除中間環節就可減省人手，加上存貨同損耗都偏少，產品嘅毛利率就相應提高，為咗盡速交貨，通常都係在地生產，此舉除咗將產品嘅碳排放減到最低，亦有助維持香港技術工人嘅生計。
至於營商人士最關注嘅租金，佢話商場為招攬人流，唔少業主都樂於以拆帳形式，或較低之租金以吸引無人銷售機進駐。