政情：立會審批工程撥款極緩慢 建造業促梁君彥勸議員回正軌
每年七月都係立法會最緊張嘅時候，唔少議程都希望趕喺暑假休會前，喺大會或財務委員會（財委會）通過，否則就要喺暑假後才能審議。建造業大聯盟尋日去信立法會主席梁君彥，促請立法會盡快重回正軌，加快審批工程撥款，叫梁要敦促議員善用議會時間喎。如果梁搞得掂，立法會就唔使因為示威者圍堵而落閘啦！
憂基建工程延誤影響福祉
信中指出，若有關稅務寬減措施嘅法案未能喺休會前通過，就會影響近二百萬納稅人，而財委會同工務小組審議民生撥款工作亦相當緩慢，擔心四間醫院重建及擴建等民生項目出現延誤，而基建工程關乎市民福祉，希望梁敦促議員放開政治議題，減少無謂爭拗，盡職責出席會議，避免流會。
建造業大聯盟發言人謝子華話，唔係針對建制泛民其中一邊，最關注結果係批出幾多項議程，希望個別泛民唔好拉布，建制派亦要坐定定開會喎。