政情：劉智鵬話重理輕文 社會易招風雨
華人教育觀念長期都係文科不及理科，優秀學生同教育資源都向理科傾斜。嶺南大學協理副校長劉智鵬話，社會無疑係需要理科人才，但精通人文學科嘅棟樑亦都不可或缺。至於何解華人都重理輕文，其實背後係有段古喎。
歷史有助掌握事件脈絡
劉智鵬尋日出席一個歷史文化學習計劃嘅頒獎禮，佢致詞時話，喺百多年前中國人深信只要船堅炮利就可以抵抗外侮，於是科技救國嘅自强主張就令到理科得到較多嘅教育資源，相比之下文科就遭到冷待。銳意發展科技本身並冇問題，而華人喺呢方面亦確有成就。不過佢就認為，人類社會相當複雜，若果純以理科嘅頭腦去看待人文問題，社會招來風風雨雨可謂毫不意外。
劉又話，喺西方社會從政人士通常係文科出身，其中以修讀歷史居多，而美國都有唔少訴訟律師同財經分析員係修讀歷史，因為歷史涉及嘅時空同層面都好廣闊，有助釐清同掌握事件嘅脈絡咁話。