中環出更：張超雄曲解過勞 被連環寸爆
立法會社會福利界議員邵家臻因違法佔領行動早前被判囚，雖然仍喺獄中服刑，但繼續提出口頭質詢，只係改由議員張超雄代問，不過就換嚟被連環寸嘞！
張超雄就話世界衞生組織首次將過勞納入《國際疾病分類》，以便醫生診斷同保險衡量賠償，但香港就仲要等研究三年先決定將過勞死列入工傷賠償，批評政府一拖再拖、不斷拉布。
僅屬職業現象 遭質疑無睇報紙
但勞工及福利局局長羅致光就反駁，指相信張超雄讀社工時應該讀過有關過勞嘅概念同文獻，而世衞已澄清只係將過勞列為現象啫！而議員何啟明仲話《東方日報》尋日已有報道，指世衞認講錯將過勞列病況，只係指過勞為職業現象，質疑張超雄無睇報紙囉，佢仲認為要解決嘅方法係標準工時立法。張超雄亂噏講錯而遭人連環指正，真係攞架嚟丟喇！
此外，由於邵家臻先後兩次申請出席立法會會議，均遭懲教署拒絕，日前其所屬嘅專業議政已去信懲教署促請讓邵可出席會議，而張超雄前日又去信內務委員會主席，要求討論由內會去信懲教署，支持邵六月五日嘅外出申請，事關當日立法會辯論推動醫療改革嘅動議，希望邵能出席會議動議修正案。
卓妮