中環出更：緊貼環保潮流鄭文聰睇好電動車
減少石化燃料一直係環保工作嘅主要訴求。日前內地有人宣稱，成功研製以水為燃料嘅車輛，尋日有份出席環保領先大獎頒獎禮嘅香港工業總會前主席鄭文聰，就認為以水作為燃料固然係環保一大喜訊，但其實呢種技術外國一早就有，發展咗一段時日都未能實用化，恐怕將來都未必及得電動車咁普及。
鄭文聰話用水做燃料，只係抽取水中嘅氫氣作為引擎嘅動力，而從水中分離氫氣嘅步驟，就必須有能源先可成事，意即用呢類車輛仲需要另接太陽能電池板之類嘅能源裝置。佢相信喺科技演進之下，今日同樣體積嘅電池，十年後嘅儲電量將會倍數上升，將來或充一次電就可以行駛過千公里，當駕駛人士都習慣用電動車，水氫車輛要打入巿場就較困難。
佢又話環保趨勢係減少石化燃料，有遠見嘅石油公司都紛紛改名為能源公司，冀開拓石油以外嘅能源以迎合將來嘅需求，而中東嘅產油大國，亦都積極投放資金於研究石油嘅替代品，以免遭到將來嘅環保潮流所淘汰。
嚴志明卡片用再生物料製
石油嘅副產品塑膠係玩具業最常採用嘅材料。經營玩具業嘅香港優質標誌局主席丁煒章，就話儘管大部分塑膠都可以循環再用，但回收過程成效不彰，原因係由使用者手上嘅塑膠交到回收商，繼而轉移至生產商嘅物流過程，就同生產商製成產品，經銷售渠道送到消費者手中嘅過程恰好相反。佢話加拿大採取住戶先行廢物分類否則回收商有權徵收額外處理費用嘅做法，能提高塑膠回收嘅效率，值得香港倣效。
香港設計中心董事會主席嚴志明都好注重物料嘅循環再用，最近佢選用再造紙來印製一批手感粗糙嘅卡片。佢仲話，再生物料成本的確較高，但想到每次遞卡片自我介紹之餘，亦順帶傳遞環保可貴嘅訊息，就算貴些少都值得咁話。
卓妮