政情:訪白廟禁露膊 游蕙禎唔敢「違法達義」

因宣誓風波而被DQ立法會議員資格嘅青年新政游蕙禎日前牛一,原來去咗泰國北部清萊遊覽著名景點白廟,點知差啲犯禁,仲直認唔敢違法達義。

游蕙禎尋日喺社交網站Facebook上載咗張相同貼文話「由於被職員要求不可露膊,所以將chut thai(泰國傳統服裝)條帶放上頸」。都算係就地取材,遮掩咗膊頭。有網友眼利,認出背景係白廟,好多網民隨即就唔准露膊熱議。

稱尊重人哋規矩

有網友問點解唔違法達義?亦有網友話喺泰國就唔好犯禁嘞,但游蕙禎就回應話「一般正規寺廟只會要求信眾不可著(着)不及膝的裙或褲。和尚也是露膊的。」有網友隨即話:「你知泰國嘅例唔係人咁品,怕你滯留異地。」佢都好認同,話:「所以佢地(哋)叫我著(着)咩我著(着)咩架o架喇,尊重黎(嚟)」。

游蕙禎喺二○一六年循立法會九龍西直選當選,卻惹起宣誓辱華風波而被DQ議員資格,及後因強行衝入會議室被裁定非法集會罪成,判囚四周。依家佢去到泰國旅遊話要尊重當地嘅規矩,究竟係經一事長一智吖?抑或係喺人哋嘅地方就唔敢輕舉妄動呢?

第一手消息請下載on.cc東網iPhone/iPad/Android/Windows Phone Apps