政情:唔講逃犯移交貿戰何志分享家鄉音樂

美國駐港澳署理總領事何志(Thomas Hodges)尋日出席一個農產品活動時,被問到點睇就移交逃犯修例同中美貿易戰,前者就話總領事唐偉康早前已回應,後者就話應該交由白宮評論,自己無補充。但去到一個推銷田納西州酒嘅攤位,被問起係咪佢家鄉時,佢就話係,好掛住家鄉,大讚田納西州好靚咁話。

佢講起家鄉嘅音樂好出名,每間酒吧都有好好嘅音樂家喺台上,笑指自己都係音樂家,自己識彈結他同bass,唱歌就OK啦,仲曾經夾band添!

七月中將調職澳洲

佢又特別去到幾個澳洲嘅攤位嗰度了解,喺塔斯曼尼亞嘅攤位試食三文魚添。佢話七月中將會調過澳洲,出任Deputy Chief of Mission,即係喺大使之下第二把交椅,嚟咗香港已經三年,通常兩、三年都會轉一次,所以係時候要調去另一個地方嘞!

第一手消息請下載on.cc東網iPhone/iPad/Android/Windows Phone Apps