政情：譚姜美珠去剪髮 十幾年來同一間
早幾日消委會公布調查指有理髮店以推銷萬元套票方式，令唔少人墮入套票陷阱。博愛醫院永遠顧問譚姜美珠（Winnie）多年來都保持超短髮型，照計經常要幫襯理髮店，唔知有冇被硬銷過護髮療程？佢就笑笑口話從未試過，事關佢十幾年來都幫襯同一間髮型屋，係熟客嚟，所以唔驚被硬銷產品囉。
剪得唔好似戴帽
雖然冇被呃嘅風險，不過講起三千煩惱絲，Winnie就有另類煩惱。因為佢嘅頭髮好厚，好多髮型師都未能駕馭，佢仲形容如果剪得唔好，就好似戴咗頂帽咁。直至十幾年前，有朋友介紹佢去中環一間理髮店，第一次幫襯就好滿意，因為師傅剪得好貼，夠晒薄，髮型可以保持到兩個月，自此就未轉過師傅喇。
話時話，中醫有話「髮為血之餘」，即頭髮濃密或髮質靚嘅人代表血氣旺盛，Winnie老公譚立仁係著名中醫師，唔通係老公有咩中藥秘方畀佢滋補？Winnie笑住話唔係，又話應該係媽媽佗緊佢時成日食高麗參嘅關係喎。