中環出更：謝偉銓講歷史 力撐保留大球場
討論多年嘅啟德體育園今年就會動工，對體育界本來係個好消息，但政府就話因為定位同香港大球場重疊，計劃將香港大球場「降格」為公眾運動場，惹嚟唔少反對聲音。立法會建築、測量、都市規劃及園境界議員謝偉銓（Tony）日前都拍咗條短片，話香港大球場係市民嘅集體回憶，用歷史同數據力撐保留大球場。
帶動灣仔變運動盛事區
Tony喺片中重提大球場嘅歷史，話自從一九五五年落成時已經有二萬八千個座位，多年來舉辦過唔少經典賽事，甚至好多國際球星都曾經喺大球場獻技，吸引過唔少市民進場，入唔到場嘅市民更加要爬上後山正民村度睇，帶動灣仔區成為「運動盛事區」，及後至九二年改建後更加可以坐成四萬人，反問係咪有需要「降格」，拆剩八千個位？
Tony仲質疑灣仔區係咪需要多一個公眾運動場，佢參考咗各區平均每幾多人可以使用一個體育館嘅數字，指灣仔區比例低於平均數，換言之，灣仔區對新體育設施嘅需求唔大，叫政府不妨諗吓畀大球場同埋啟德體育園共存，等香港嘅體育事業可以發展得更加蓬勃咁話。
卓妮