中環出更：時間寶貴車弘健寧畀擠塞費
最近政府連環出招解決塞車問題，包括打算喺中環一帶實施電子道路收費，仲研究徵收「擠塞費」，一眾車主恐怕避免不了要留低「買路錢」。卓妮早前同唔少名人傾開呢個話題，日日穿梭港九、新界嘅香港浙江省同鄉會聯合會常務副會長車弘健（Anthony）話，唔會因此唔揸車，事關時間最寶貴，寧願畀少少錢買番時間咁話。
Anthony家住九龍，公司喺新界葵涌，至於社會活動就多數喺港島，加上太太王曉樺喺中環返工，有時都要接送，所以佢經常使用多條隧道往返，亦成日喺中環、灣仔一帶出入。Anthony話明白政府需要解決塞車問題，好似中環喺尖峰時段經常塞車，確係令人好頭痛。
顧東華出行好少離開港島
保良局總理顧東華就形容香港啲交通真係亂晒龍，所以佢平時只喺港島活動，好少過海。由於佢住喺港島，工作及社會活動都喺港島，如果朋友約佢食飯，過海一定唔會去喇，佢試過成個月都冇過海添！
香港中華總商會會董李惟宏（Robert）同埋上海總會監事長王緒亮個仔王立德（Brian）都從事金融業，平時都喺中環返工，亦都係車主。Robert話無論將來徵費情況係點，都唔會放棄開車。不過佢都有應對辦法，如果只係喺中上環同灣仔一帶出入，就會選擇坐港鐵。Brian就話入親中環都係為咗工作，唔係嚟玩，所以相信收費對減少擠塞嘅作用唔大，如果到時收費太貴，佢就會盡量唔開車嘞！
卓妮