政情：葉劉想傾 陳帆想拖 規管領展柯仔頭痕

葉劉同Alice提出嘅草案，係透過修訂《房屋條例》及《稅務條例》，以制訂規管租金增幅嘅機制及設立現有租客租用優先權，以及引入空置稅嘅方式，以解決現時部分商場及街市被指租金過高及空置率高等問題，而規管範圍涵蓋出售予領展及領展已轉售嘅物業。日前兩人仲對外公布，話已成功取得律政司發證書說明草案符合格式，亦針對字眼等技術性修改，未來會約見政府討論。

柯稱積極同雙方夾時間 盡快上會

據聞，葉劉已聯絡柯仔想盡快提上會兼搞公聽會，柯仔唔想只有議員齋噏，所以同葉劉商量等政府回應先。其後柯仔就聯絡陳帆夾時間，當時陳雖冇直接拒絕，但言語間都係想拖多陣，不過柯仔企硬，認為始終都要做。

柯仔回覆時承認正積極同雙方夾時間，會盡快上會。葉劉回覆時亦承認，有搵柯仔安排，佢亦有直接聯絡陳帆想約見面，點知陳竟然問佢攞條例草案嚟睇，相信係太忙、太多火頭要救，陳仲未睇過草案寫乜。結果依家變咗約特首傾，睇吓點做。

建制派未達共識 草案最終或否決

不過，上到會亦唔代表做得到。據知Alice今次係用其議員辦事處身份而非工聯會（工記）同葉劉夾，皆因黨內仍未對立法達成共識，工記人講少啲就當幫忙。有好多議員亦慨嘆，既然係政府當初賣產做錯，一係回購，一係提高市場競爭力，唔係破壞市場規矩、藥石亂投就可以解決！

同時多名資深建制派都認為，草案將建制派擺上枱，大家都認同領展要處理，但立法單一規管一間公司並唔合理，真係撐又死，唔撐又死。亦有建制派聲稱，為咗大局着想，最後可能都要否決草案，就算大家都係建制一樣冇面畀喎！依家寄望政府點樣回應，建制派先知有冇華麗轉身嘅最後舞台。