政情：少年羅致光做義工遇毒蛇

羅致光提到啲相係四十五年前影嘅，當年佢趁暑假期間，同其他義工一齊幫村民起一條石屎路，仲話大熱天時做勞動工作，對年輕人嚟講係一生難忘嘅經歷。除咗起石屎路同埋剪草，佢仲曾經喺元朗一間安老院「髹灰水」，事隔雖然都成四十年，但佢就話仲歷歷在目。

做義工冇金錢上嘅回報，但羅致光話，見到受助人嘅笑容時，嗰份滿足感係無價回報。佢仲話，根據研究調查，好多義工都係大忙人，仲話忙唔應該係唔做義工嘅藉口。話時話，依家做咗局長嘅佢夠晒忙，唔知佢仲有冇繼續做義工呢？