中環出更：修訂逃犯例 謝偉俊選主席 諗定計防拉布
港府早前提出修訂《逃犯條例》，嚟緊星期三（17日）就會召開首次條例草案委員會，仲會選埋正、副主席。傳聞本身係律師嘅立法會議員謝偉俊（Paul）將會競逐主席一職，佢出席電視節目時預告，會嚴厲執行議事規則，同埋話預計會開公聽會添！阿Paul櫈都未坐定就咁快諗定策略，唔怕到時有暗湧？
自言形象較中立
阿Paul話，自己嘅形象比較中立，相信由佢主持會議嘅話，爭議會比較少，仲話如果得到議員支持，就會當仁不讓出任主席。不過條例嘅爭議性大，而審議時間倉促，所以佢預計喺法案委員會審議時，唔會用少過七十個小時去審議，而公聽會都會召開一至兩次。唔少反對聲音都係鬧政府冇做公眾諮詢，依家阿Paul話會開公聽會，似乎係幫政府補鑊喎。
阿Paul仲講明到時會嚴格執行議事規則，喺過分離題、同議題冇關、重複性過高、攻擊性太強及人身攻擊太多等方面，會揸緊去做，強調自己唔係剪布，希望唔會被認為係獨裁、高壓嘅主席咁話。
卓妮