中環出更：企業教練任務似巴士 趙善智讚幫到手

趙善智日前應金紫荊女企業家協會邀請，去講解教練呢門新興行業，香港國際專業教練協會會長衛立佳都有出席。趙話，教練原本屬於體育方面嘅角色，喺上世紀七十年代嘅美國，開始滲入企業董事局會議當中，逐漸形成後來嘅企業教練同人生教練。佢話「Coach」呢個英文字有「教練」同埋「巴士」兩個意思，說明教練嘅任務就好似一架巴士咁，係由起點帶領對方去到目的地。

趙又話，因為每個人家庭背景同成長經歷都唔同，作為教練就切忌將自己嘅經驗強行灌輸畀對方。佢認為要透過聆聽同提問去激發對方嘅潛能，組織思緒發現盲點，再由對方自行諗出解決問題嘅方法。不過佢都話，如遇上「自信爆棚」或「世事都看透」嘅人，教練就無用武之地喇。

鄺紫凌（左）同妹妹鄺韻凌（右）都認為成功嘅企業有賴上下一心嘅團隊精神。（徐家浩攝）

鍾雅倫（左）話機艙服務員訓練亦有用上教練模式，右為時裝設計師蔡毅明。

鍾雅倫話教練模式助培訓新人

香港女青年商會會長鍾雅倫本身係空姐，佢話機艙服務員嘅訓練亦有用上教練模式，令新入職同事了解其任務本質，並致力達到崗位上應有嘅表現，培養出由心出發嘅待客禮儀。

金紫荊女企業家協會副主席鄺紫凌同妹妹鄺韻凌分別從事工場生產同貨品零售，佢哋認為成功嘅企業應該係上司同下屬建立密切嘅團隊關係，共同為公司定下嘅目標而努力，如有教練從旁協助，就應該更加理想喎。

卓妮